Kev ua neej nyob hauv lub qab ntuj no thaum peb tshwmsim los Vajtswv yog tus Tswv tsim peb los tso rau hauv peb niam lub plab.
Chivkeeb 2:21-22: TUS TSWV UAS YOG VAJTSWV THIAJ UA RAU TUS TXIVNEEJ NTAWD TSAUGZOG HEEV; THAUM NWS TSAUGZOG LAWM, VAJTSWV THIAJ RHO NWS IB TUG TXHA TAV LOS THIAB MUAB LUB QHOV NQAIJ NTAWD FOOB NQAWM ROV ZOO LI QUB. VAJTWV MUAB TUS TAV NTAWD LOS TSIM UA IB TUG POJNIAM THIAB COJ NWS LOS COB RAU TUS TXIVNEEJ.
Twb yog vim Vajtswv xub tsim tus txivneej los ua neej nws mam li muab ib tug tav los puab ua tus pojniam, peb noobneej thiaj li yuav muaj txijnkawm thiaj tsheej ib yig. Vim li no cov ntxhais uas tau tus txiv zoo thiab lub neej zoo kuj yog nws nrhiav tau tus uas yog nws tus tswv uas Vajtswv tsim tiag tiag. Hos tus uas ua lub neej los txog ib nta li kuv ntshe yog nrhiav tau tus tsis yog los xyov yog vim ua li cas. Tiamsis txawm yog li cas los ua Vajtswv tsaug qhov uas kuv yog tus uas raug Vajtswv xaiv thiab Vajtswv hu es kuv thiaj muaj feem los ua Vajtswv tus ntxhais. Los nyob hauv Vajtswv lub xubntiag, txawm yog kuv lub neej mus tsis nto ntsis los kuv txaus siab.
Ntawm no kuv yuav hais txog kuv lub neej thaum kuv tau kev tsaus ntuj. Uas yog thaum kuv lub neej plam mus lawm es ho los ua ib lub neej peb Hmoob hu hais tias yog ib txhais yim neej lawm ho nyuaj npaum li cas. Kuv hais raws li uas kuv tau raug los lawm xwb. Peb haiv Hmoob muaj ib lo lus hais tias yog tsis muaj tus txiv ces tebchaws saib tsis taus yus. Yeej muaj tseeb tiag li lawv hais.
Muaj tej yam uas ua rau kuv qaug zog rau sab siab ntsws thiab kev ntseeg Vajtswv. Xws li, muaj tej tus niamtsev hais rau kuv hais tias kuv yuav raug rho npe tawm tswvcuab hauv pawg ntseeg vim kuv tus txiv yog ib tug xibhwb es tseem mus ua txhaum loj npaum li no lawm. Thiab muaj tej tus niamtsev hais tej cov lus txo yus lub zog thiab coj tus yamntxwv qhia rau yus paub hais tias nws xav li cas rau yus. Tej tus niamtsev lam tau lam muab kuv tus xovtooj rau tej tus txivneej Hmoob yam tsis tau lus tso cai saib kuv puas kam muab, ua rau kuv tu siab twj ywm. Txawm yog tej yam zoo li no xwb los cia li ua rau yus tu siab, qee lub sijhawm kuv cia li tsis xav mus pehawm Vajtswv li lawm. Hos ho muaj tej tus txivtsev los lawv coj tus cwjpwm zoo li nws tsis ntseeg siab rau kuv tsis xav pub nws tus pojniam nrog kuv tham los yog uake li. Kuj ua rau kuv xav tsis thoob li thaum lub sijhawm no kuv ua lub neej ntab yuj yeev zoo li kuv nyob rau saum nplaim dej lawm xwb. Kuv kuj muaj qhov tu siab qaug zog heev li. Kuv thov Vajtswv heev li mam li mus nrhiav kev txhawb zog kuv hnov kuv lub siab hais rau kuv tias kev ua neej nyob tsis yog nyob rau neeg ntiajteb lossis cov neeg hauv pawg ntseeg. Yog nyob tos peb tus Tswv Yexus xwb. Mus pehawm tsis yog pehawm tibneeg, yus mus pehawm yus tus Vajtswv xwb.
Kuv mus nyeem nyob hauv phau Vajluskub ntawm Yaxayas 54:4-5: KOJ TSIS TXHOB NTSHAI. KOJ YUAV TSIS RAUG KEV TXAJ MUAG LAWM. KOJ YUAV TSIS SWB LEEJTWG LI. KOJ YUAV TSIS NCO TXOG TEJ KEV PLEES KEV YIS UAS KOJ UA THAUM KOJ TSEEM HLUAS. THIAB TSIS NCO TXOG TEJ KEV NYUAJ SIAB UAS THAUM KOJ UA POJ NTSUAM LAWM. TUS TSWV TSIM KOJ YUAV ZOO LI KOJ TUS TXIV. NWS LUB NPE HU UA TUS TSWV UAS MUAJ HWMCHIM LOJ KAWG NKAUS UAS PAB KOM KOJ DIM. YOG TUS KAV TAGNRHO LUB NTIAJTEB NO HUV TIBSI.
Nqe Vajlugkub no tsa kuv sawv ntawm txojkev tu siab kev qaug zog rov qab los. Vajtswv yog tus zam kuv tej kev txhaum thiab pab kuv thiaj muaj txojsia nyob txog hnub no. Kuv thov qhuas kuv tus Vajtswv mus ibtxhis li.
Kuv thov txhawb peb ib tsoom vivncaus uas yog ib txhais yim neej txhua tus. Cov uas nej tus txiv ncaim mus nrog Vajtswv nyob lawm lossis mus hlub dua lwm tus lawm xwb, kom nej tsis txhob tas kev ciasiab. Tseem tshuav peb tus Vajtswv. Nws hlub peb heev. Hlub tshaj li peb tus txiv hlub peb nawb mog. Yeej meem mob siab rau ntseeg thiab ciasiab rau Vajtswv. Nws txojkev hlub thiaj nyob mus ibtxhis.
Kuv ho thov hais rau cov vivncaus uas nej tseem muaj lub neej puv npo hnub no...kom nej nco ntsoov tias peb ua neej nyob peb tsuas paub nag hmo thiab hnub no xwb. Peb twb tsis paub xyov tagkis yam dabtsi yuav tshwmsim tuaj rau peb. Thov peb pab hlub cov tsis muaj tus txiv thiab mog. Yog nej tau lub neej zoo ces nej yeej meem ua zoo thiaj tau koob hmoov zoo. Vim txojkev ua ntsuag no peb yeej tsis muaj leejtwg yuav khiav dhau li os mog. Kuv hais los xaus li no xwb. Thov peb leejtxiv Vajtswv hlub peb sawvdaws txhua tus hauv Tswv Yexus lub npe.
Ana Yang (N. Nyiaj Xyooj Yaj)
Ana Yang (N. Nyiaj Xyooj Yaj) is a beloved child of God. Her passion is to share the Gospel of Jesus Christ with the world. She is a mother to 10 children and has been blessed with many sons and daughter in laws, as well as 9 grandchildren. She lives in Portland, Oregon and serves faithfully in her local church (Portland Hmong Alliance Church) as the Prayer Coordinator and Elderly Sunday School Teacher. She also serves on the Alliance Women Ministries of the Hmong District prayer team. In her spare time, she enjoys gardening, cooking and caring for others.
Comments